crossorigin="anonymous">
 

28 jiyè 2021 make 106èm anivèsè okipasyon amerikèn nan peyi Dayiti

Mèkredi 28 jiyè 2021 make 106èm anivèsè okipasyon amerikèn nan peyi Papa Desalin nan. Nan okazyon an, plizyè gwoup pwofite denonse sa yo rele "ingérence" peyi ki di yo se zanmi Ayiti yo nan zafè peyi Dayiti.


Nan Delma 32 kote yon masak te fèt nan lannuit sòti 29 rive 30 jen 2021 ki te lakòz anviwon 15 moun mouri ak bal pami yo militan politik Marie Antoinette Duclaire ak jounalis Diego Charles, nan okazyon 106èm anivèsè okipasyon amerikèn nan peyi a jounen 28 jiyè a, plizyè sitwayen ak kèk dirijan politik te prezan nan Delma 32 pou rann omaj ak plizyè konpatriyòt ayisyen sa yo ki te tonbe anba bal endividi moun pa rive idantifye nan zòn sila.


Nan depatman Sid peyi Dayiti, toujou nan okazyon 106èm anivèsè okipasyon amerikèn nan peyi Dayiti jounen mèkredi 28 jiyè 2021 an, opozisyon politik la òganize yon jounen refleksyon otou sa li rele "ingérence" kominote entènasyonal la nan zafè peyi Dayiti. Plizyè manm nan opozisyon politik nan Sid ki te prezan fikse pozisyon yo sou sijè sa.


Mèt Léon Pierre Antoine kwè peyi a toujou okipe sou yon lòt fòm atravè Corp Group ak BINUH. Daprè li, Etazini ak lòt peyi ki di yo se zanmi Ayiti yo se responsab malè nou. Mesye Antoine deklare peyi sa yo di yo se zanmi Ayiti poutan se pa vre. Li pran kòm egzanp sitiyasyon aktyèl peyi a ye kote ensekirite ap vale tèren toupatou ak lamizè ki pa sispann taye banda anba je Corp Group.


Bò kote pa l, Edgel Mondésir ki se tou manm opozisyon politik nan Sid estime ameriken yo pa ede nou nan anyen. Mesye Mondésir panse pito ameriken yo fouye nou pi plis nan twou a. Pou sa, Edgel Mondésir rele tout vrè Ayisyen yo pou konvèti tèt yo an Rosalvo Bobo ak Benoit Batraville pou kapab libere peyi a anba zong kolon sa yo.


Opozisyon inifye a nan depatman Sid peyi Dayiti mande ak tout sektè nan lavi nasyonal la pou mete yo ansanm pou kapab jwenn yon akò politik pou sòti peyi a nan kriz li ye depi kèk tan.


Jacky M. Fontaine

TANBOU VERITE

 

0 comments