crossorigin="anonymous">
 

7 jiyè 2021 - 7 septanm 2021 : 2 mwa depi prezidan Jovenel Moïse asasine

Madi 7 septanm 2021 sa fè ansyen prezidan Jovenel Moïse de (2) mwa depi mesenè etranje te asasine lo lakay li nan Pèleren 5, nan lannuit madi 6 rive mèkredi 7 jiyè 2021. Pou montre yo pa bliye Jovenel Moïse epi kontinye egzije jistis pou li, divès pèsonalite politik reyaji nan dat 7 septanm nan ki make de (2) mwa lanmò prezidan Jovenel Moïse.


Premye minis Ariel Henry nan yon twit li fè li di : << 7 jiyè 2021 - 7 septanm 2021: jodi a fè egzakteman de (2) mwa depi zak asasinay prezidan Jovenel Moïse. Krim sa a p ap rete enpini. #Gouvènman mwen an detèmine pou prezidan an jwenn #jistis, epi pou asasen yo al jije jan lalwa mande sa. >>


Bo kote pa l, ansyen prezidan Michel Joseph Martelly li menm tou reyaji sou twitè : << 7 septanm 2021 fè 2 mwa nap tann jistis pou Prezidan Jovenel Moïse. Nou pa dwe janm bliye kote enpinite simen, se ensekirite kap donnen. Jwenn #JistisPouJovenel rete youn nan pi gwo priyorite pèp Ayisyen an. @moisejovenel >>


Minis Jistis ak Sekirite Piblik la, Rockefeller Vincent li menm tou reyaji nan okazyon de (2) mwa asasina Jovenel Moïse la. Li fè konnen rèv prezidan Jovenel la ki se te rann lib peyi a k ap benyen nan kòripsyon epi penmèt tout ayisyen viv tankou moun pap etenn. Minis Rockfeller Vincent presize nan twit la asasen Jovenel Moïse yo p ap janm dòmi anpè. Minis lan ki di li angaje l pou prezidan Jovenel Moïse jwenn jistis raple asasen yo y ap rapousuiv yo jouk nan dènye jou yo.


Pi lwen, Rockfeller Vincent ki rekonesan pou sa li di prezidan Jovenel fè li pou li, sòti Komisè Gouvènman nan Koudapèl, pase kòm Direktè jeneral ULCC rive Minis Jistis ak Sekirite Piblik, deside san gade dèyè pou rann prezidan Jovenel Moïse jistis.


Minis Rockfeller Vincent rapousuiv san li pa twò klè di yo vle kontwole tout bagay, CSPJ, Jij yo, Pakè, dekana, MJSP pou de (2) rezon : 1- Kouvri asasen prezidan Jovenel Moïse yo; 2- Pèsekite advèsè politik. Rockfeller Vincent ki sanble kanpe fèm di avèk li, pwojè makab sa ap rete yon ilizyon. Li fè konnen li se obstak la menm.


Reyaksyon yo ki anpil epi ki pa sispann tonbe, Martine Moïse ki se te madanm prezidan Jovenel Moïse li menm tou pa rete san di anyen nan okazyon de (2) mwa depi mari l asasine. Martine Moïse ekri sou twitè : << Sa fè 2 mwa yo kraze tout zo Prezidan Jovenel. Yo fèl pou yo di nou ke tèt kana pa gen dwa monte tab. Yo fèl pou yo di moun ki soti lwen lwen lwen yo pa gen dwa pran sant lavi miyò. Se pou sa Jodi a nap makonnen vwa nou ak vwa Pèp la poun kontinye mande:

#JISTISPOUPREZIDANJOVENEL >>


Jacky M. Fontaine

TANBOU VERITE

0 comments