crossorigin="anonymous">
 

Achidyosèz Pòtoprens pataje doulè viktim tranbleman tè 14 dawout 2021

Achidyosèz Pòtoprens nan yon nòt solidarite lanse apèl ak tout popilasyon an pou fè prèv solidarite ak tout viktim tranbleman tè samdi 14 dawout la. Li pwofite pou mande tou ak nèg ak zam Matisan pou obsève yon trèv. Achidyosèz la ki remèsye davans nèg ame yo nan katye Matisan ak Fontamara k ap goumen kont yonn lòt mande pou yo depoze zam yon fwa pou tout epi ini yo nan doulè lòt ayisyen parèy yo pou bay pasaj ak èd nesesè pou rive sou Gran Sid peyi a ki kraze aprè pasaj tranbleman tè mayitid 7,2 sa.


Achidyosèz la mande pote solidarite ak popilasyon an nan Okay, Jeremi, Jakmèl, Nip ak tout Gran Sid la ki nan yon sitiyasyon trè difisil nan moman an. Bò kote pa yo, moun legliz sa yo fè konnen y ap priye pou popilasyon viktim sa yo.


Achidyosèz la presize nan nòt solidarite sila nan peryòd eprèv sa ki pwovoke pa yon vyolan tranbleman tè, li di li regrèt ti kras enfrastrikti ki te rete yo detwi ak anpil moun ki mouri tou. Achevèk Pòtoprens lan Monseyè Max Leroy, klèje a ak fidèl achidyosèz yo mete vwa yo ansanm pou eksprime solidarite yo ak tout viktim tèrib tranbleman tè sa ki frape peyi Dayiti samdi 14 dawout 2021 pase a.


Achidyosèz la, toujou nan nòt solidarite sa, ankouraje aktè ak desidè yo pou aji rapidman ak efikasman nan ekstrèm ijans sitiyasyon an mande sou baz yon evalyasyon syantifik domaj ki anrejistre aprè pasaj tranbleman tè a. Li pale konsa daprè sa li ekri nan nòt la se nan lide pou aksyon otorite yo reponn ak bezwen nesesè epi efikas popilasyon an nan depatman ki touche yo.


Achidyosèz la ki anonse l ap ede nan lapriyè viktim tranbleman tè 14 dawout la mande tout gason ak fanm ki gen bon volonte pou ede sinistre yo nan diferan depatman ki touche pa tranbleman tè sa ki lakoz anpil fanmi ayisyèn ap kriye.


Jacky M. Fontaine

TANBOU VERITE

0 comments