crossorigin="anonymous">
 

Afaganistan : prezidan an mawon ak 4 machin, Yon elikoptè epi 169 milyon dola

Daprè RIA Novosti, yon ajans nouvèl nan peyi Risi, ki tap site yon pòt-pawòl anbasad Ris la nan Kaboul, ansyen prezidan Afaganistan an, Ashraf Ghani ta sove kite peyi a ak 4 machin epi yon elikoptè plen lajan.


Nikita Ishchenko, pòt-pawòl anbasad la te deklare :« Efondreman rejim nan karakterize sitou nan fason Ghani sove kite peyi a : kat (4) machin plen lajan. Yo te eseye tou mete yon lòt pòsyon lajan nan yon elikoptè men li pat ka pran tout. Yon bon pati te rete sou pis la».


Yon lòt bò, Kawoon Khamoosh, yon jounalis BBC, ekri sou twitter :«Anbasad Afghan an nan Tadjikistan di Ghani sove ak plizyè valiz ki gen ladan yo antou 169 milyon dola lè taliban yo anvayi Kaboul la».


Se te premye fwa yo te mansyone ki kantite lajan prezidan an te bwote. Yon ofisyèl ris te di avan sa yo pa konn konbyen e te swete prezidan an pat ale ak tout lajan bidjè nasyonal la.


Yon ti tan aprè prezidan an te sove e al refijye l' Emira Arab Ini, revi Forbes te anonse anbasad afgan an nan Tadjikistan te mande Interpol pou li arete prezidan an paske li ta detounen anpil lajan nan kòf peyi a.


Ashraf Ghani te sove kite Afaganistan nan moman taliban yo te prèske rantre Kaboul. Li te deside kite pouvwa a pou evite, daprè sa li di pou evite san koule. Pou kounye a, li refijye l' Emira Arab Ini ki afime yo akeyi l' ak tout fanmi l' pou rezon imanitè.

0 comments