crossorigin="anonymous">
 

Ayiti/Jistis: Laurent Lamothe menase pou l’ pote plent kont moun kap sal non l

Updated: Apr 11, 2021


Depi dram 12 mas 2021 an kote yon gwoup polisye te pèdi lavi yo nan Village de Dieu, anpil moun leve vwa yo pou yo denonse moun kap fè zam rantre ilegalman nan peyi a.


Ak vag denonsiyasyon sa a gen yon videyo ansyen depi Arnel Bélizaire kap sikile sou rezo sosyal yo. Nan videyo sa a ki date de 2013, ansyen depite Dèlma-Taba a denonse ansyen premye minis Laurent Lamothe ki te kòmande 200 galil an mas 2012.


Sekretarya ansyen premye minis la pat pran tan pou li te reyaji fas a sikilasyon videyo sa a atravè yon nòt li pibliye jounen lendi 15 mas la.


Nan nòt sa a, Sekretarya patikilye ansyen premye minis lan denonse yon laboratwa manipilasyon ak fo nouvèl kap Mennen yon kanpay kont li epi tou pwofite fè kèk rapèl sou yon kòmand yo te fè an 2012.

Nan kòmand sa a, daprè sa nòt la di, Konsèy Siperyè Polis Nasyonal la te achte 15 000 pistolè, 5 000 fizi 12, 1 000 galil pou inite espesyalize yo, plizyè kamyon ak machin blennde.


Pi lwen biwo a eksprime konstènasyon l’ pou l’ wè moun yo kwè nan pawòl yon evade prizon epi kalifye kanpay sa a de divèsyon pou fèmen je sou moun ki an reyalite ap founi gang yo zam yo.


Nan fen nòt la, sekretarya a rezève l’ dwa pou trennen devan lajistis tout moun ki dèyè kanpay sa a. Nap siyale an 2012 deja, Laurent Lamothe te rele lajistis yon jounal ebdomadè pou difamasyon.


Laurent Salvador Lamothe te premye minis Michèl Mateli soti me 2012 pou rive desanm 2014. Jiska jodi a li se premye minis nan istwa peyi a ki pase plis tan an fonksyon.


Luckson Valcourt

Tanbou Verite

0 comments