crossorigin="anonymous">
 

Ayiti: yon tranbleman tè mayitid 7 pase samdi 14 dawout sa

Tè a tranble byen bonè samdi 14 dawout 2021 sa nan peyi Dayiti. Daprè premye eleman enfòmasyon yo, plizyè komin nan peyi a frape kote plizyè dega anrejistre. Nan Jeremi, katedral Sen Lwi Wa de Frans ak legliz advantis rive kraze pandan pasaj tranbleman tè mayitid 7 sa.


Daprè depite Ronald Étienne, yo resanse 2 moun mouri nan Pestèl ak plizyè moun blese. Ansyen depite a ajoute pou di Dichiti se yon zòn ki sitiye nan komin Pestèl ki konplètman kraze.


Gen enfòmasyon ki fè konnen tou nan komin Aken biwo ACME ki se yon antrepriz prive konplètman detwi. Manolo Pressoire Hotêl nan Ti Rivyè Nip sibi domaj tou, toujou daprè enfòmasyon ki rive jwenn TANBOU VERITE.


Enfòmasyon nou dispoze pou moman TANBOU VERITE ap ekri atik sa ta fè kwè gran Sid la plis frape. Depatman Sid ak Grandans sanble anpil dega rive anrejistre aprè pasaj tranbleman tè a, daprè imaj ki rive jwenn TANBOU VERITE.


Anpil imaj k ap sikile sou rezo sosyal yo moutre anpil kay kraze; anpil dega materyèl anrejistre. Pou moman, TANBOU VERITE poko gen enfòmasyon sou dega moun ki mouri nan tranbleman tè sila.


Pwoteksyon sivil pwofite raple popilasyon an sonje aprè tranblemanntè toujou gen replik. Moun nan rejyon Sid peyi a, pa rete anndan kay ni akote bagay ki ka tonbe sou nou.


Jacky M. Fontaine/Danio Daniel

TANBOU VERITE

 

0 comments