crossorigin="anonymous">
 

FIFA sanksyone yon ansyen responsab foutbòl fanm nan Federasyon Ayisyèn nan



Lendi 3 me a, Fifa kondane Nella Joseph pou l’ pase 10 lane san li pa antre nan okenn aktivite ki lye ak foutbòl akoz enplikasyon l’ nan eskandal abi seksyèl plizyè jèn tifi ki nan ekip nasyonal fanm yo te victim.


Jij etik Fifa yo rekonèt ansyen sipèvizè seleksyon tifi ki gen pi piti pase 20 lane yo koupab paske li ta fòse kèk tifi ouvè kò yo bay ansyen prezidan federasyon an, Dadou Jean-Bart.

Ane pase Fifa te ekspilse Dadou pou lavi nan zafè foutbòl.


Yon jijman Fifa nan ka ansyen prezidan an te deklare li vyole tifi apati laj 14 lane epi li te genyen plizyè mennaj pami fanm ki nan seleksyon an apati 2014.


Nan yon kominike, FIFA fè konnen Nella Joseph "pat reyisi pwoteje entegrite fizik ak mantal anpil tifi ki te sou otorite l’ ak responsablite l’" nan ranch Kwadèboukè a.

Nella Joseph kondane tou pou li peye yon amand 20 000 fran swis (22 000 dola).


Fifa deklare komite etik li a ap travay sou anpil lòt dosye ki konsène responsab foutbòl yo nan peyi a.


Nap raple eskandal seksyèl sa a te pran lari aprè yon atik jounalis Romain Molina te pibliye nan yon jounal britanik, The Guardian, nan mwa avril ane pase a.


Luckson VALCOURT

valcourtlucks@gmail.com

0 comments