crossorigin="anonymous">
 

Gwo mach pasifik jounen dimanch 28 mas 2021 an

Updated: Mar 31, 2021


Anpil moun te pran lari dimanch 28 mas sa nan Pòtoprens kont ensekirite ak kont retou diktati an Ayiti. Pwotestatè yo te sitou mete aksan pou mande respè Konstitisyon an. Yon mach ki te lanse pa òganizasyon dwa moun yo, sosyete sivil la, sektè relijye a ak divès pèsonalite nan lavi nasyonal la pou di <<Non>> ak zak kidnapin, san nou pa site lòt, k ap fè fanmi ayisyèn yo kriye dènye tan sa yo.


Nan mach pasifik 28 mas sa, anpil manm nan popilasyon an te akonpaye plizyè dirijan nan opozisyon politik ayisyèn nan pou te foule beton an, daprè sa divès medya te konstate.


Yon mach ki te dewoule jounen dimanch 28 mas la san ensidan ak vyolans, daprè sa medya yo rapòte. Kite nou siyale, popilasyon an envite pou mache nan lari a 28, 29 ak 30 mas, daprè modòd òganizasyon ki te anonse 3 jounen mach pasifik yo te bay pou dimanch 28, lendi 29 ak madi 30 mas 2021 an.


Depi 14 fevriye 2021, peyi a an jeneral ap mache kont moute fenomèn ensekirite a ak yon retou diktati nan peyi Dayiti. Kite nou raple, 14, 21 ak 28 fevriye 2021, Pèp Ayisyen an te fè yon demonstrasyon anfòs lè li te desann nan lari a pandan yo anpil anpil pou montre kolè yo ak fristrasyon yo kont ensekirite a k ap ogmante nan peyi a ak yon vitès nou pa kapab kontwole, pou di <<NON>> ak yon retou <<diktati>> epi egzije pou Jovenel Moïse kite pouvwa pwiske manda li fini depi 7 fevriye 2021 daprè opozan ak rejim sa.



Jacky Médé Fontaine

TANBOU VERITE

0 comments