crossorigin="anonymous">
 

Kèk bagay ou pa t konnen sou nouvo lejand baskèt la GIANNIS ANTETOKOUNMPO

Milwaukee Bucks sot ranpòte dènye NBA ki te pase a la. Nou te ka wè ak klè, Bucks yo te vrèman yon bèt nan zafè make pwen. Men, dèyè tout eksplwa sa yo, gen yon kokennchenn basketè ki pote ekip li sou do l. Non l pa lòt ke Giannis Antetokounmpo.


Giannis Antetokounmpo se jwè baskèt yo pi byen peye aktyèlman. Kisa nou dwe konnen sou pitit imigran nijeryan sa ki vin yon spòtif eksepsyon? Sou planèt baskèt la, a 26 an, Giannis rive kote l te vle rive a. Anfèt, se tout Staff Milwauckee Bucks la ki te atenn rèv yo. Mèkredi 21 jiyè a, franchiz Wisconsin nan ki anba lidèchip Giannis ranpòte final NBA a.


Sa fè senkant lane depi bucks yo t ap karese rèv sa. Giannis Antetokounmpo te fè yon match solid sa ki ta pral bay Greko-Nijeryan sa, ki fèt an 1994, nan Kapital peyi Lagrès, Atèn, premye bag li.


Ki istwa ki kache dèyè kokennchenn basketè sa ?

• Fanmi Giannis Antetokounmpo renmen jwe baskèt. Giannis ( 26 an, 2,11 mèt ) te pèmèt 2 frè li entegre NBA a. Li fè Thanasis, gran frè li ( 29 an, 1,98 mèt ) rejwenn li nan Milwauckee pandan ke ti frè l Kostas ( 24 an, 2,09 mèt ) ap pran ban nan Los Angeles Lakers.


• Aprè viktwa li nan NBA a, premye minis grèk la te fè yon tweet kote l te di Giannis se fyète peyi Lagrès. Men Antetokounmpo se te yon apatrid. Se jouk lè l te gen 18 lane ke Giannis Antetokounmpo te vin sitwayen grèk byen ke l fèt nan peyi Lagrès. Men, depi an 2015, Giannis avèk twa lòt frè l ki fèt nan peyi Lagrès gen paspò nijeryan.


• « Le grec monstrueux » se ti jwèt non sa ke yo bay Giannis nan NBA a. Se toutafè nòmal, paske anplis de fizik sans parèy li a, Giannis pa sispann fè eksplwa.


Li te fini meyè jwè sezon regilye a, an 2019. Meyè jwè ankò e meyè defansè an 2020 avan ke l te pran tit chanpyon sa an 2021 kote ke l fini meyè jwè final la. Sèl Michael Jordan avèk yon lòt nijeryan Hakeem Olajuwon te fè prèske menm bagay la nan yon ti kal tan. • Giannis t ap vann nan lari avan l rive kote l ye. Si li menm avèk frè l yo te konn ap vann mont ak linèt pou fè lajan, kounya lavi l chanje. Kounya, MVP dènye final NBA an gen yon salè prèske 46 milyon $ pou 5 pwochen sezon li pral pase a Bucks yo, yon kontra ki te evalye a 228 milyon $ ke l te siyen nan fen 2020 an.


• Ou ka di Antetokounmpo oubyen Adetokundo. Giannis te resevwa yon edikasyon nijeryan pa manman l Veronica e yo te pale youn nan lang nijerya yo ki se Igbo. Men, lè yo ta pral resi jwenn nasyonalite grèk la an 2013, yo te chanje Adetokundo a ( non nijeryan ) an Antetokounmpo. Selon Lejand nijeryan an, Hakeem Olajuwon, non sa siyifi '’ kouwòn nan ap rantre nan peyi a '’. Non sa, Adetokundo, te byen ale ak Giannis vrèman paske l te rejwenn lejand nijeryan an, Hakeem Olajuwon.


• Giannis toujou di l fyè dèske l se afriken. Menmsi l ap jwe nan peyi Etazini epi l konn jwe pou Lagrès, sa pa anpeche ke l toujou ratache ak nijerya. Li te menm jwe yon match NBA te òganize an Afrique du Sud, malgre defèt ekip li a, Team Africa, 97-101 kont ekip Team World la, li te soti meyè makè match la a 22 pwen.


• Giannis Antetokounmpo manke vin yon foutbolè. Li te kite pratik jwe a 12 an kote ke l t ap suiv tras papa li Charles, yon ansyen jwè foutbòl nan peyi a. Francis ki se pi gran frè li te menm jwe pou yon klèb dezyèm divizyon nan peyi Lagrès. Men, lanmou l pou foutbòl toujou kenbe. Li se yon fanatik malad Arsenal.

Thierry Henry se jwè prefere l devan trio afriken sa : Didier Drogba, Samuel Éto’o, Yaya Touré. Pandan kèk tan, se te kesyon LeBron James, Stephen Curry, Kevin Durant ki te konn pale. Kounya, Antetokounmpo mete men l balans lan e fè konnen ke baskèt la gen yon nouvo wa. Dènyeman, prezidan Joe Biden te resevwa yo e menm bay kèk jwè nan ekip Milwauckee a, pami yo Giannis Antetokounmpo, meday pou onore yo.


Luckensly LUMA

0 comments