crossorigin="anonymous">
 

Lapolis dominiken arete Sonson La Familia

Woodly Etheart, yo plis konnen sou non Sonson La Familia, jwenn arestasyon l’ samdi 15 me a an Repiblik Dominikèn, sou wout Boca Chica.


Depi 2019, lajistis, atravè Paul Eronce Villard ki te komisè gouvènman nan epòk la, te lage dèyè li menm ak Renel Nelfort alyas Renel Le Récif yon avi de rechèch aprè Lakou Kasasyon te pran an me 2018 yon jijman pou òdone l’ tounen nan prizon pou l’ ka jije devan tribinal kriminèl pou anlèvman ak sekestrasyon, blanchiman lajan « sal » ak trafik dwòg.



Sonson La Familia te jije pou menm enfraksyon sa yo epi jwenn liberasyon l’ an 2015, lè sa a se jij Lamarre Bélizaire ki te libere l’. An me 2018, Lakou Kasasyon te anile desizyon jij la.


Nan dat 7 out 2019, yon ti kras pi plis pase yon lane aprè, komisè gouvènman Pòtoprens te pibliye yon kòrespondans kote l’ mande DCPJ mennen de (2) mesye yo ba li.


Aprè arestasyon l’ samdi a, lapolis dominiken te remèt Sonson La Familia bay lapolis pa bò isit dimanch 16 me a. Pou kounye a, li nan DCPJ annatandan li parèt devan tribinal.


Luckson Valcourt

valcourtlucks@gmail.com

0 comments