crossorigin="anonymous">
 

Mali:Yon fanm akouche 9 timoun


Yon fanm ki se moun peyi Mali akouche 9 timoun yon sèl kou nan vil Casablanca, nan peyi Maroc. Se minis sante malyen an ak lopital kote l’ akouche a ki anonse sa.


Sanble se premye fwa yo anrejistre yon ka kote yon fi fè 9 timoun tou vivan. Manman an ak timoun yo, 5 tifi ak 4 ti gason, yo tout byen daprè sa minis sante Mali a deklare nan yon kominike.


Pi gwo responsab sante peyi Mali a fè konnen medsen yo te fè Halima Cisse, ki gen lane, sezaryèn pou li te ka fè bebe yo aprè yo te fin voye li nan peyi Maroc pou li te kapab jwenn swen espesyal li te bezwen.


Kèk jounalis te ka wè timoun yo kap bouje men yo ak pye pandan yo nan « incubateur » yo nan klinik Ain Borja ki twouve li Casablanca.


Cissé tap ret tann 7 bebe. Gouvènman malyen an te mande medsen yo pou yo te voye l’ Maroc pou li al akouche paske lopital Malyen yo pa ekipe ase pou mòd gwosès sa yo.

Youssef Alaoui, direktè klinik ki te fè akouchman an, deklare bay televizyon leta mawoken an kèk medsen malyen te kontakte yo sou ka sa a sa gen yon mwa edmi. Li afime yo pa tap tann 9 bebe.


Cissé te akouche avan lè sou 30 semèn. Kounye li nan yon eta estab men si yo te oblije ba li san akoz li te pèdi anpil san.

Halima Cissé kapab tou rantre nan liv Guinness rekò yo, men pou sa fèt fòk yo verifye avan enfòmasyon an.

Jiskaprezan se yon amerikèn, Nadya Suleman, ki genyen rekò a aprè l’ te fin akouche 8 timoun vivan an 2009.



Luckson VALCOURT

valcourtlucks@gmail.com

0 comments