crossorigin="anonymous">
 

Nigeria: nèg ak zam kidnape anviwon 20 etidyan nan yon inivèsite


Yon gwoup nèg ame atake yon inivèsite nan Eta Kaduna nan nò peyi Nigeria. Daprè pòtpawòl lapolis nan zòn nan, yo touye yon anplwaye epi kidnape yon bon kantite etidyan.


Yo poko konnen konbyen etidyan. Men, selon sa de (2) responsab inivèsite fè konnen genyen pou pi piti 20 etidyan yo pa wè. Yo pa konnen si se bandi yo ki kidnape yo oswa si se sove yo sove.

Minis enteryè a konfime atak sa a.


Depi plizyè mwa, nèg ak zam ap fè lalwa nan zòn sa a . Yo rantre nan lekòl yo epi kidnape plizyè moun yon sèl kou epi mande ranson pou yo libere yo. Soti desanm rive jodi a yo gentan kidnape 730 elèv. Nan kòmansman mwa mas la, yon gwoup bandi te rantre nan yon pansyona ki nan yon lise, yo te kidnape 49 elèv, jiskaprezan se 10 ladan yo sèlman ki libere. Kidnapè yo te pibliye videyo kote yap bat timoun yo epi mande fanmi yo ak otorite yo vin peye ranson pou yo ka libere yo.


Semèn pase a nan yon konferans pou laprès, prezidan asosiyasyon elèv yo te denonse otorite nan zòn Kaduna a ki pa janm fè anyen pandan yo entèdi paran yo negosye ak kidnapè yo. Nan konferans sa a, Friday Sani te deklare:"Timoun yo pa benyen depi 36 jou, yo pap byen manje, yo pa gen bon dlo pou yo bwè, yo pa gen rad, ni medikaman".


Plizyè Eta nan nò ak sant peyi a oblije fèmen lekòl yo akoz ensekirite, sa ki riske ogamante kantite moun ki pa al lekòl nan peyi a, deja zòn sa yo se kote ki gen plis timoun ki pa al lekòl nan peyi a.


Selon Unicef, gen 5 milyon timoun ki riske pa ka al lekòl nan zòn sa yo.


Responsab Unicef yo deklare:"Jan atak ak zak kidanpin sou elèv yo ap ogmante la a, se tout sistèm eskolè a kap efondre si anyen pa fèt ".

0 comments