crossorigin="anonymous">
 

Nijerya : medsen yo leve kanpe paske prezidan an al pran swen an Angletè

Madi 30 mas la, Muhammudu Buhari, prezidan Nijerya a, pran avyon li ale Londres pou li al pran swen. Sante prezidan an frajil, sa ki vle di se pa premye fwa li al wè doktè nan peyi etranje. Sof ke fwa sa a medsen nan peyi a frape pye yo atè.


Depi premye avril la tout lopital yo pa fonksyone. Medsen yo kanpe travay pou yo denonse sa yo rele yon «tourisme médical» ki koz dirijan yo nan pi wo nivo Leta a neglije sistèm sante.


Laprès, pwofesyonèl sante yo ak manm opozisyon yo eksprime endiyasyon yo an patikilye sou rezo sosyal yo kote yo pataje #BuhariMustGo plizyè milye fwa.


Youn nan dirijan opozisyon yo, Omoyele Sowore, mande pou yo mennen prezidan an tounen lakay li pou li pran swen nan youn nan bèl lopital li konstwi yo.


Muhammudu Buhari se yon ansyen militè, lap dirije peyi a depi 2015. Pandan prezidans li an li mennen yon batay kont kòripsyon nan peyi a men anpil moun kritike l' paske li pa janm atake alye l' yo men se pito opozan yo.


Depi 2017 lap fè fas ak gwo pwoblèm sante ki koz li konn kite peyi a pou plizyè mwa pou li al pran swen nan peyi etranje.

0 comments