crossorigin="anonymous">
 

<< Non, nèg ak zam pa pran annotaj Santral Pelig la >>, se deklarasyon ajan sekirite EdH nan Santral

Mouvman pwotestasyon ajan sekirite Santral Pelig la depi plis pase 1 mwa ap rapousuiv kote madi 22 jen 2021 an plizyè dizèn ajan sekirite EdH ki travay nan Santral Idroelektrik Pelig la leve kanpe pou mande peye yo daprè sa yo di plizyè mwa travay EdH dwe yo.



Depi plis pase yon mwa yon gwoup ajan sekirite Elektrisite Dayiti ki di yo pa touche bloke Santral Idroelektrik Pelig la. Kriz sa k ap pèsiste nan Santral Idroelektrik Pelig la oblije Minis Travo Piblik ak Kominikasyon an Joisséus Nader voye yon delegasyon vin rankontre ak ajan sekirite yo jounen madi 22 jen an nan objektif pou jwenn yon solisyon ak kriz la k ap brase bil sit Elektrisite Dayiti nan nivo Pelig.


Delegasyon MTPTC an di yo byen kontan akèy ajan sekirite k ap revandike pou yo peye yo lajan yo di EdH dwe yo ba yo pandan delagasyon an pwomèt Minis Joisséus Nader pral analize dosye ajan sekirite ki pa touche yo pou Direksyon Jeneral Elektrisite Dayiti peye yo si yo travay pou sa.


Ajan sekirite EdH nan Santral Pelig la k ap fè mouvman pwotestasyon pou mande peye yo (yon gwoup ajan yo dwe 3 mwa., yon lòt gwoup ajan yo dwe 2 mwa) bay yon semenn ak delegasyon an pou rive fè Direksyon Jeneral Elektrisite Dayiti peye yo lajan yo dwe yo daprè deklarasyon yo.


Plizyè ajan sekirite ki te pale nan mikwo TANBOU VERITE fè konnen si EdH pa peye yo se pou li "jete dlo a ba yo tè yo pou yo fè jaden" paske daprè sa yo di tè Pelig la kote Santral Idroelektrik Pelig la ak baraj Pelig la konstui a se pou gran paran yo li ye. Ajan sekirite yo di EdH ap peye yo lajan yo dwe yo a si se pa sa yo pral pase nan yon lòt faz nan batay yo a ki kapab petèt pi bosal ak pi regretab pou peyi a.


Plizyè dizèn ajan sekirite Elektrisite Dayiti nan sit Santral Pelig la ki mobilize pou yo jwenn lajan yo di EdH dwe yo a di yo voye jete byen lwen pawòl ki ta fè kwè yo se yon gwoup nèg ak zam ki pran annotaj Santral Pelig la. Ajan sekirite sa yo ki konpoze de fanm ak gason di yo pa bandi men yo se ajan sekirite k ap travay epi ki pa touche, yo deside leve kanpe pou fè vwa yo rive byen lwen pou Direksyon Jeneral Elektrisite Dayiti tande kri yo.


Ajan sekirite Junior BRUNAUD, Marco GEORGES, Jonel JEAN ak Robenson GAUSSE ki te bay TANBOU VERITE entèvyou ale nan menm sans lan pou lanse anpil pawòl piman bouk kont Direktè Jeneral EdH la Michel Présumé ak Direksyon Jeneral Elektrisite Dayiti ki dwe yo plizyè mwa travay daprè sa yo di. Plizyè dizèn ajan sekirite sa yo avèti si Elektrisite Dayiti pa peye yo lajan yo dwe yo bagay la ap gen pou chavire.


Jacky M. Fontaine

TANBOU VERITE

0 comments