crossorigin="anonymous">
 

Otorite ameriken yo depòte plis pase 320 ayisyen jounen dimanch 19 septanm 2021 an

Jan sa te anonse, otorite ameriken yo reyaji devan plizyè milye migran ayisyen ak lòt peyi nan Amerik Santral la ki tap eseye rantre ilegal sou teritwa ameriken an.


Bri tap kouri nan mitan semèn nan imigrasyon ak ladwàn ameriken prevwa fè 8 a 10 vòl pou Ayiti nan semèn kap rantre yo pou mennen tounen moun sa yo ki anba pon sou fwontyè ant Meksik ak Etazini an.


Yè dimanch lan, genyen 320 konpatriyòt ladan yo divès timoun piti ak tibebe ki debake nan ayewopò Toussaint Louverture a abò twa (3) avyon.


Pou plizyè nan moun sa yo rantre etazini ak timoun tap fasilite otorite yo kite yo rete sou tè ameriken an, malerezman sa pa rive fèt.


Depòtasyon sa yo vini nan yon konteks kote plizyè milye ayisyen ap tante rantre san papye Kay Tonton Sam.


Daprè enfòmasyon kap sikile, moun sa ki te anviwon 2000 nan kòmansman semèn pase a, te pase a 15 000 nan fen menm semèn. Anplis, kantite moun ki sou wout yo ta sanble depase lontan sa ki gentan sou fwontyè a.


Nap souliye, anpil nan moun sa yo te konsanti gwo sakrifis pou yo al chache lavi miyò kay blan meriken.


Premye minis ayisyen an, Ariel Henry, sou bò pa l te pwomèt nan yon mesaj sou twitter lap pran tout mezi pou byen akeyi sitwayen sa yo ki pou kounya pa konn ak ki sen pou adrese yo. Jiskaske moman nou ap ekri atik sa a nou poko konn a klè ki mezi chèf primati a te pran.


Tweet premye minis lan sanble depaman ak obsèvasyon direktè OIM nan nan peyi a ki deklare Ayiti pa pare pou li resevwa migran yo.


Si nou pran an kont reyalite peyi a ant lè moun sa yo te kòmanse kite peyi a sa gen gen mwens ke 10 lane ak jan sa ye jodi a, nou kapab di moun sa yo pati pou yo konnen plis mizè pase sa yo te viv avan.


DANIEL DANIO

TANBOU VERITE

daniodaniel063@gmail.com

0 comments