crossorigin="anonymous">
 

PM Ariel Henry revoke Minis Rockefeller Vincent, Sekretè Jeneral Rénald Lubérice ak Komisè Gouvènman

Premye Minis Ariel Henry revoke titilè MJSP a, Rockefeller Vincent, Sekretè Jeneral Konsèy Minis yo Rénald Lubérice epi Komisè Gouvènman Pòtoprens lan, Bed-Ford Claude. PM Ariel pran desizyon sa nan yon Konsèy Minis li prezide lendi 13 septanm 2021 an, kote li t ap apwouve siyati akò ak pati politik yo.


Malgre sèten minis kanpe ankwa kont desizyon sa, Ariel Henry deside avanse tèt dwat lè li revoke Minis Rockefeller Vincent, Sekretè Jeneral Rénald Lubérice epi Komisè Gouvènman Tribinal Premyè Entans Pòtoprens lan Bed-Ford Claude. Daprè enfòmasyon yo, arete ki konsakre revokasyon minis Jistis ak Sekirite Piblik la Rockefeller Vincent, Sekretè Jeneral Konsèy Minis yo Rénald Lubérice epi Komisè Gouvènman Bed-Ford Claude, poko enprime onivo Près Nasyonal.


Premye Minis Ariel Henry ta va genyen nan plan l ansyen kowòdonatè OMRH la, Josué Pierre-Louis pou ranplase Rénald Lubérice nan pòs Sekretè Jeneral Konsèy Minis yo.


Nan menm batay sa, ansyen Minis Jistis ak Sekirite Piblik la, Rockefeller Vincent te mande Direktè Jeneral Polis Nasyonal Ayiti a pou li pa egzekite okenn lòd ki sòti nan CSPN san Ministè ki sou tèt PNH la pa bay apwobasyon l. Minis Rockefeller te raple Léon Charles enstitisyon Polis Nasyonal Ayiti a se anba titèl Ministè Jistis ak Sekirite Piblik li ye pandan li te bay lòd ak DG PNH la pou ranfòse sekirite Komisè Gouvènman Pòtoprens lan, Bed-Ford Claude, pou koz menas.


N ap raple, nan anvan dènye rankont Konsèy Siperyè Polis Nasyonal (CSPN) Premye Minis Ariel Henry te òganize a, minis Jistis ak Sekirite Piblik la p at jwenn envitasyon pou patisipe. Daprè Chèf Gouvènman an, li konsidere Rockefeller Vincent an rebelyon kont li.


Jacky M. Fontaine

TANBOU VERITE

0 comments