crossorigin="anonymous">
 

Polemik Ozetazini aprè yon depite konpare Etazini e Izrayèl ak Taliban yo

Ilhan Omar, youn nan de (2) premye mizilman ki eli nan Kongrè ameriken an, twouve l' nan mitan yon gwo polemik akoz li ta mete nan yon sèl panye Etazini, Izrayèl, Afghanistan, Hamas ak Taliban yo.



Nan yon piblikasyon li fè sou kont twitter l', Omar, 38 lane, ki fèt Somali e ki te rive Etazini nan mitan ane 1990 yo, te ekri : «Nou wè atwosite nou pat menm dwe Etazini, Izrayèl, Afghanistan, Hamas ak Taliban yo komèt.»


Pawòl sa deranje anpil manm Kongrè a ki pat pran tan pou mande l' bay plis eksplikasyon sou pawòl li yo. Genyen ki ale pi lwen pou mande pou yo retire nan plizyè komite li ye nan "Chambre des Représentants" yo.


Pou montre dezakò yo ak pwopo Omar yo malgre yo nan menm pati, yon gwoup 12 kongrèsmann jwif demokrat pibliye nan mitan semèn nan yon lèt tou louvri.


Kevin McCarthy, youn nan figi prensipal pati Repibliken an nan Kongrè a kritike pwopo Omar yo epi akize demokrat yo akoz yo tolere antisemit yo pandan yo senpatik ak teworis yo.


Devan polemik sa a, Omar eseye pote kèk klarifikasyon sou deklarasyon li yo. Li fè konnen li pat janm gen entansyon asimile yon seri Eta demokratik ak gwoup teworis jan moun yo vle fè kwè l' la.


Si yon bon kantite manb pwòp pati l' la pa mete dlo nan bouch yo pou yo kritike l', Omar kapab konte sou sipò Alexandria Ocasio-Cortez ki di li bouke wè jan nan pwòp pati yo yo pa janm sispann kritike Omar.


Li ajoute sa danjere anpil pou li. Pa gen lontan Ilhan Omar te di lap resevwa menas lanmò e li te pataje jedi ki sot pase a yon mesaj odyo kote yon nonm ap di mizilman yo se teworis.

0 comments