crossorigin="anonymous">
 

Rockefeller Vincent : << Ayiti gen obligasyon pou rann Prezidan Jovenel Moïse Jistis>>

Minis Jistis ak Sekirite Piblik la ki apenn revoke a, Mèt Rockefeller Vincent, sou Twitè, deklare "Ayiti gen obligasyon pou rann jistis a Jovenel Moïse ki mouri asasinen lakay li nan Pèleren 5 nan lannuit madi 6 pou rive mèkredi 7 jiyè 2021." Daprè ansyen minis lan, rann Jistis a Prezidan Jovenel Moïse se yon kesyon diyite nasyonal.


Rockefeller Vincent di li konte sou endepandans jistis peyi l pou fè limyè blayi sou ka anblematik sa epi tout lòt ka ki nan soufrans yo.


Dezòmè ansyen minis, Rockefeller Vincent presize li kite Ministè Jistis ak Sekirite Piblik avèk santiman li byen fè travay li. << Mwen kite MJSP avèk santiman devwa akonpli. Mwen remèsye tout kolaboratè m yo nan tout sèvis nan Ministè a pou sensè kolaborasyon yo san repwòch pandan pasaj mwen nan tèt Ministè regalyen sa. Ansanm, nou te antreprann de gwo chantye. >>


Minis Rockefeller, toujou sou Twitè, rapousuiv pou di : << Mwen espere kontinite Leta pral penmèt gwo refòm mwen te angaje avèk kolaborasyon tout moun pou ranfòse kapasite sektè jidisyè a nan peyi a kontinye. Viv yon jistis lib ak endepandan nan avantaj tout jistisyab. >>


Rockefeller Vincent ki te konn toujou ap fè elòj pou Jovenel Moïse, vle montre li rekonesan. << Konfyans S.E.M Jovenel Moïse te plase nan mwen te penmèt mwen sèvi peyi a kòm DG ULCC, aprèsa kòm Minis Jistis ak Sekirite Piblik avèk diyite, konpetans, lwayote epi sans sèvis piblik, aprè long karyè m nan Majistrati a. >>


Jacky M. Fontaine

TANBOU VERITE

0 comments