crossorigin="anonymous">
 

Village de Dieu, kochma PNH la?

Updated: Apr 5, 2021

Vandredi 12 mas la, Lapolis mennen yon operasyon rate nan Village de Dieu. Daprè sa youn nan chèf baz sa a ta di, polisye yo tonbe nan pyèj li te tann pou yo a. Stanley Eugène, Ariel Poulard, Georges Renoit, Alexis Georges Vivender, Desilus Wislet se non 5 polisye ki tonbe pandan operasyon sa a. Echèk operasyon sa a, zak maspinay polisye yo sibi, soulve endiyasyon tout moun nan sosyete a men se pa premye fwa lapolis mòde gwo pous li nan Village de Dieu. Ann fè yon kout je sou kèk operasyon lapolis te mennen deja nan zòn sa a.


17 avril 2018: Lapolis blese Arnel Joseph, epi .... se tou

Jou madi sa a nan aswè, kèk ajan lapolis rive antre anndan vilaj la, rasanble yo nan yon kay, ak yon grenn objektif nan tèt yo: Fouke Arnel. Men se te san konte ak antèn gwo chèf la genyen. Byen rapid, li repere polisye yo epi katouch kòmanse tire. Popilasyon an panike, anpil inosan blese. Lapolis abandone operasyon devan panik popilasyon. Men kanmenm lapolis rive blese Arnel ak kèk lòt sòlda.


3 novembre 2018, lapolis rantre vilaj, Arnel fonn kou bè

Jou sa a plizyè inite nan Lapolis mele ak sòlda jòdanyen mobilize pou yo al dechouke bandi sa yo kap simen latroublay nan zòn nan. Lapolis rive rantre, yo fouye plizyè kay pami yo kay Arnel Joseph. Pandan operasyon sa a yo rive sezi 3 moto san plak, arete 80 moun. Men Arnel pat sou lis la. Aprè operasyon sa a, direktè jeneral lapolis nan epòk, Michel-Ange Gedeon, pral pwomèt 2 milyon goud a nenpòt moun ki ede yo mare towo a.

Konvoke nan palman an, DG a denonse yon machin plak ofisyèl ki ta rantre nan zòn nan nan moman operasyon an. Toutfwa, nan konvokasyon sa a, li afi me avan manda l’fini lap arete Arnel. Sa li pral rive fè lendi 22 jiyè 2019.


Lucmane Delile: Gwo van, ti lapli

24 avril 2020, nan yon rankont premye minis Joseph Jouthe ak laprès, ansyen minis jistis la, Lucmane Delile, bay tout sitwayen pèzib kap viv nan vilaj la 3 jou pou yo kite l’. Desizyon sa a te fè anpil tole nan laprès e anpil sektè nan vi nasyonal la te kont li, an patikilye òganizasyon dwa moun yo.

Finalman, dèle 3 jou a pase, okenn sitwayen pa kite zòn nan, lapolis pa entèvni nonplis.


2 atak nan 2 semèn an desanm 2020

Normil Rameau pran tèt lapolis la an out 2019, aprè plis ke yon lane nan tèt enstitisyon an li pa rive asire sekirite popilasyon an. Dirijan egzekitif la deside revoke l’ epi nome yon nouvo direktè.

Leon Charles pral enstale nan pòs la le 16 novanm 2020. 4 desanm 2020, lapolis mennen premye operasyon l’ sou direksyon Leon Charles anndan Village de Dieu. Operasyon sa a vini an repons a plizyè atak kont kèk patwouy lapolis.

Anpil inite espesyalize anndan lapolis la te mobilize pou reprann kontwòl zòn nan. Pandan plizyè èdtan, katouch tap chante nan zòn nan sa ki pral kreye yon gwo pamnik nan zòn ozalantou yo.

Yon fwa ankò, lapolis pral fè bèk atè. Bandi yo pou yo selebre viktwa yo yo pataje plizyè videyo premye opersayon sa a sou facebook.

2 semèn aprè, Lame a pral rejwenn lapolis pou yon lòt operasyon. Pandan operasyon sa a, plizyè gwo chèf nan baz la ta pran raje pou yo pami yo Izo. Aprè operasyon lapolis te rive mete anba kòd 21 moun.

Men, yon ti tan aprè, Izo tounen ap fè lalwa nan baz li.

Jiskilè sa ap fini?

Malgre tout volonte lapolis montre pou li kwape bandi sa yo kap teworize popilasyon twazyèm sikonskripsyon an, li klè rezilta yo poko vini. E chak jou pi plis, sitiyasyon an ap pi kritik. Anpil polisye denonse mank materiel yap fè fas ak li pandan bandi yo ap vin plis ekipe chak jou. Yon reyalite ki diferan de deklarasyon repiblik la. Nap raple, 22 fevriye ki sot pase a, Jovenel Moise te deklare sou 102 gwoup ame ki gen nan peyi a li deja demantle 64.


Luckson Valcourt

valcourtlucks@yahoo.fr

0 comments