crossorigin="anonymous">
 

Yon jenn gason mouri aprè plizyè polisye fin maltrete l’

Peguy Simeon se non yon jenn gason ki rann dènye souf li sou kabann lopital madi 11 me a nan aprèmidi aprè li fin pase yon move moman anba men plizyè ajan nan lapolis la nan zòn Wanament.


Daprè enfòmasyon yo, viktim nan tap viv Repiblik Dominikèn depi plis pase 10 lane. Lendi 10 me a, imigrasyon depòte l’ akoz li pat gen papye. San yon goud nan pòch li, sou anplis, li deside pran woulib nan yon bis ki te genyen abò l’ yon gwoup misyonè katolik. Devan ensistans jèn gason an, ta sanble misyonè yo rele lapolis ki vini. Yon polisye monte sou do machin nan epi lage jèn gason an atè.


Sa pat kanpe la, lè l’ fin tonbe atè a, polisye ki te rete atè a yo kontinye maltrete l’ kòm kwa so a pat sifi pou li.


Peguy Simeon vin ajoute non l’ nan yon lis ki gen ladan l’ plizyè moun lapolis etenn souf yo alòske yo te fin metrize yo oubyen yo pat reprezante okenn menas pou yo. Pami viktim sa yo, nou ka site Vladimir Fédé ak Romario Saintrilice. San bliye Grègory Saint-Hilaire yo ajan USGPN ta tire nan lokal Lekòl Nòmal Siperyè.


Si daprè kèk rimè yo ta idantifye kèk pami polisye ki ta enplike nan zak maspinay sou Peguy Simeon an, fò n’ souliye otorite nan lapolis la poko di anyen sou zak sa a.


Luckson Valcourt

valcourtlucks@gmail.com

0 comments