crossorigin="anonymous">
 

Yon vòlkan eklate sou zile Sen Vensan


Yè vandredi a, zile Sen Vensan ki twouve l' nan zòn Karayib la te gen gwo kouri akoz La Soufrière, yon vòlkan ki mezire 4049 pye, te eklate.


Eksplozyon sa a koz gen anpil sann nan syèl epi lakoz plizyè mil moun kouri kite zòn nan pou sekirite yo.


Nemo, yon enstans ki la pou jere ijans nan peyi a, te mande moun yo kite zòn nan. Selon sa òganizasyon sa a deklare premye eklatman te pwovoke nyaj ki rive jiska 20 mil pye.


Daprè kèk imaj nou ka wè sou rezo sosyal yo gen anpil dechè ki sòti nan vòlkan an san pale de sann ki anvayi zòn alantou yo. Sepandan, yo poko rapòte moun ki mouri.


Nan aprèmidi jounen vandredi a te genyen 2 lòt eksplozyon.


Premye minis zile a, Ralph Gonsalves, pase lòd pou anviwon 1600 moun kap viv nan zòn nan kite l' prese prese.


Pou ede moun yo kite zòn nan gentan genyen 4 bato ki disponib pou sa. Nan jou kap vini yo ta dwe gen yon senkyèm.


Nan yon konferans pou laprès, premye minis lan deklare pou yon moun monte youn nan bato yo fòk ou pran vaksen kont Kowona viris la.


Kèk zile ki antoure Sen Vensan gentan pare pou resevwa moun yo se ka pou Sainte-Lucie, Grenade, Barbade ak Antigua.


Sa gen plis ke 40 lane depi vòlkan sa pat eklate. Dènye fwa li te eklate a se te nan ane 1979. An 1902, gen yon eksplozyon ki te touye 1600 moun. Yon ti tan aprè, nan Martinique, yon vòlkan te eklate, li te detwi vil Saint-Pierre epi touye 30 000 moun.

0 comments